लक्ष्मण घिमिरे ।
अर्घाखाँची । नेकपा एमालेबाट गाउँपालिका उपाध्यक्ष बनेकी लक्ष्मी गौतम नेपाली कांग्रेसमा प्रवेश गरेकी छिन् । २०७४ मा भएको स्थानीयतहको निर्वाचनमा नेकपा एमालेबाट उपाध्यक्षमा निर्वाचित गौतम सोमवार कांग्रेस प्रवेश गरेकी हुन् । गाउँपालिका महासंघको केन्द्रीय सदस्य समेत रहेकी गौतम एमाले भित्र प्रभावशाली नेतृका रुपमा स्थापित थिईन्। पछिल्लो समय उनले एकिकृत समाजवादी रोजेको चर्चा थियो ।
नेपाली कांग्रेस पाणिनी गाउँपालिकाले दुर्गाफाँटमा आयोजना गरेको वृहत आमसभा कार्यक्रममा नेपाली कांग्रेसका केन्द्रिय महामन्त्री गगन कुमार थापाले गौतम सहित ४ सय जनालाई टिका र मालाले स्वागत गरे । महामन्त्री थापा सहित कांग्रेस केन्द्रिय सदस्य पुष्पा भुसाल, संजय गौतम लगायतले उनीहरुलाई पार्टीमा स्वागत गरेका थिए ।
नेकपा एमाले, नेकपा माओवादी, नेकपा एस लगायतका ४ सय बढी नेता तथा कार्यकर्ता नेपाली कांग्रेसमा प्रवेश गरेका हुन् ।