लक्ष्मण घिमिरे ।
अर्घाखाँची । भुमिकास्थान नगरपालिका वडा नम्बर-१, ढाकावाङ्गका वडाअध्यक्ष गोपालप्रसाद खनालले आफ्नो जन्मदिनको अवसरमा बेञ्च वितरण गरेका छन् ।नवनिर्वाचित अध्यक्ष खनालले जेठ १६ गते पर्ने आफ्नो जन्मदिनको अवसर पारेर ढाकावाङ्गका २५ ओटा सार्वजनिक ठाउँमा ग्रिल सहितको बस्ने बेन्च उपलब्ध गराएका हुन् ।
वडा नम्बर-१ को पिपलनेटा, कालिमाटी साम्नेगाउँ, राजिमे, छेंडापोखरी, मगर साम्नेगाउँ, गहते, कोलाचौपारी, पुलबारी, ओखटे, माझापोखरा, ठुलाखोला, ढाकावाङ्ग प्रहरी चौकी, खड्काथाना मन्दिर लगायतका ठाउँमा २५ वटा बेन्चहरु उपलब्ध गराएका हुन । बैशाख ३० गते सम्पन्न स्थानीय तहको निर्वाचनमा नेपाली काङ्ग्रेस बाट उनी वडाध्यक्ष निर्वाचित भएका थिए ।
खनालले सार्वजनिक ठाउँमा बेन्च उपलब्ध गराउदैं जन्मदिनको अवसरमा आफुले कुनै पनि फजुल खर्च नगरी वडा भित्र रहेका समस्यालाई मध्यनजर गरेको बताए । ‘सार्वजनिक ठाउँमा यी बेन्चको आवश्यकता थियो,उनले भने,‘अन्य मनोरञ्जनमा खर्च गर्नुभन्दा सबैले प्रयोग गर्न मिल्ने ठाउँमा सहयोग गरें ।’ खनालले आगामी वर्षको आफ्नो जन्मदिनमा पनि यस्तै किसिमले आवश्यकता अनुरुप अन्य क्षेत्रमा पनि सहयोग गर्ने बताएका छन् ।
