राष्ट्रिय स्वतन्त्र पार्टीका सभापति रवि लामिछानेले अमेरिकी नागरिकका हैसियतमा नेपालमा रहेकै बेला झूटा विवरण दिई राहदानी लिएको विषयमा छानबिन भइरहेको र त्यसको निरूपण राहदानी कानुनअनुसार हुने सर्वोच्च अदालतले जनाएको छ ।
स्वतः निष्क्रिय भएको नेपाली नागरिकता पेस गरी लामिछाने प्रतिनिधिसभा सदस्यको उम्मेदवार बनेको भन्दै योग्यताको प्रश्न उठाएर दायर रिटमाथि फैसला गर्ने क्रममा सर्वोच्चले राहदानीको प्रसंग पनि उल्लेख गरेको हो ।
लामिछानेले स्वतः निष्क्रिय भएको नेपाली नागरिकता पेस गरेर नेपालबाट राहदानी पनि लिएका थिए । तर प्रतिनिधिसभा सदस्य पदमा उम्मेदवार भएको विषयमा मात्रै मुद्दा परेकाले राहदानीका विषयमा थप व्याख्या गर्न सर्वोच्चले अस्वीकार गरेको छ ।
राहदानीसम्बन्धी उजुरीमाथिको छानबिन लामिछाने गृहमन्त्री भएपछि जिल्ला प्रशासन कार्यालय र प्रहरी प्रशासनले रोकेका थिए । लामिछाने सर्वोच्चको फैसलाले पदमुक्त भएपछि पनि प्रहरीले उक्त छानबिनलाई अगाडि बढाएको थिएन । छानबिनसम्बन्धी सम्पूर्ण कागजातका सक्कली फाइल सर्वोच्चमा बुझाइएकाले फैसलाको पूर्णपाठ आएपछि मात्रै ती फिर्ता हुने र थप प्रक्रिया अगाडि बढ्ने जनाइएको थियो । यसैबीच लामिछानेको राहदानीका विषयमा जिल्ला प्रहरी परिसर काठमाडौंले अनुसन्धान गरिरहेको देखिएको भन्दै जिल्ला सरकारी वकिल कार्यालय, काठमाडौंले निवेदक युवराज पौडेललाई फागुन २ मा जानकारी गराएको थियो ।
लामिछानेले एकै पटक अमेरिकी र नेपाली दुवै नागरिकका हैसियतमा नेपालमा बसेका थिए । ५१२९६६९८१ नम्बरको अमेरिकी राहदानीमा गैरपर्यटक (नाता) भिसा लगाएर लामिछाने २०१५ मे ११ मा त्रिभुवन अन्तर्राष्ट्रिय विमानस्थलमा ओर्लिएको अभिलेख छ । उनले त्यसको १६ औं दिन मे २७ मा ०८८३४८३८ नम्बरको नेपाली राहदानी लिएका थिए, यसका लागि उनले २०५० फागुन १० मा जारी भएको नेपाली नागरिकता बुझाएका थिए ।
पर्यटक भिसामा आएर काम गरेको विषयमा विवाद भएपछि लामिछानेले सन् २०१८ मा अमेरिकाको नागरिकता र राहदानी त्यागको प्रक्रिया थालेका थिए । उनले २०७५ जेठ ५ मा नेपालस्थित अमेरिकी दूतावासमा निवेदन दिई नागरिकता त्याग्न लाग्ने दस्तुर बुझाएर प्रक्रिया अगाडि बढाएका थिए । उनले अमेरिकी नागरिकता परित्याग र राहदानी ‘सरेन्डर’ गरेको स्वीकृतिपत्र २०७५ असार १४ मा प्राप्त गरेका थिए ।
सर्वोच्चले नागरिकता पुनःप्राप्तिको प्रक्रियामा जानुपर्ने फैसला सुनाएपछि लामिछानेले उपप्रधानमन्त्री, सांसद र पार्टी सभापति पद गुमाएका थिए । माघ १५ मा जिल्ला प्रशासन कार्यालयबाट नागरिकता ब्युँताएपछि उनी पार्टी सभापति छन् । @ekantipur.com