१४ जेष्ठ २०८१, सोमवार
१४ जेष्ठ २०८१, सोमवार

भारतसँग नेपालको गर्विलो पराजय

नेपाली क्रिकेट टोलीका भारतीय प्रशिक्षक मोन्टी देसाईले केही पक्षमा कमजोरी हुँदा मंगलबार १९औं एसियाली खेलकुदको क्वार्टरफाइनलमा भारतसँग पराजित भएको प्रतिक्रिया दिएका छन्।

बिर्सनलायक बलिङ र केही खराब फिल्डिङसँगै पुरुष क्रिकेटको क्वार्टरफाइनलमा नेपाल भारतसँग २३ रनले पराजित हुँदै एसियाली खेलकुदबाट बाहिरिएपछि प्रशिक्षक देसाईले आफ्नो टोलीको कमजोरी औंल्याएका हुन्।

‘पराजित भए पनि खेलाडीहरूले सकारात्मक विश्वासका साथ प्रदर्शन गर्नु सबैभन्दा ठूलो पक्ष रह्यो। रणनीतिअनुरूप ब्याटिङमा खेलाडीले धेरै राम्रो गरे,’ प्रशिक्षक देसाईले भने, ‘समग्रमा खेल सकारात्मक रह्यो। त्यो लक्ष्य पूरा गर्न सकिन्छ भन्ने आत्मविश्वासका साथ खेलाडीले खेले। तर, फिल्डिङमा केही खराबी भयो।’

प्रशिक्षकले फिल्डिङमा केही कमजोरी हुँदा १०/१५ रन बढी गएको उल्लेख गर्दै खेलाडीको प्रदर्शनमा पनि गर्व गर्ने ठाउँ रहेको धारणा राखे। पङफेङस्थित झेजियाङ युनिभर्सिटी अफ टेक्नोलोजी क्रिकेट मैदानमा यशस्वी जैसवालको शतकप्रेरित भारतले नेपालसामु दुई सय तीन रनको चुनौतीपूर्ण लक्ष्य प्रस्तुत गरेको थियो। जबाफमा नेपालले निर्धारित २० ओभर नै खेल्दै ९ विकेटको क्षतिमा एक सय ७९ रन बनायो। विशाल लक्ष्य पछ्याएको नेपालका ब्याटर पनि ठूला सट खेल्दै इन्डियन प्रिमियर लिग (आइपिएल) का स्टार बलरमाथि हाबी भए।

आइपिएलका स्टार र भारतीय टोलीबाट खेलिसकेका खेलाडीसहित भारत चीन आएको हो। ट्वान्टी–२० फरम्याटका स्टार खेलाडी रहेकाले भारतलाई यस एसियन गेम्सको सबैभन्दा बलियो दाबेदार टोलीका रूपमा हेरिएको छ।

बलिङमा नेपालका बलर निरीह साबित भए। यद्यपि, ब्याटिङमा भने नेपालले राम्रो प्रदर्शन गर्‍यो। नेपालले सुरुदेखि आक्रामक खेल्ने प्रयास गरे पनि सफल हुन सकेन। नेपालका दीपेन्द्रसिंह ऐरीले सर्वाधिक ३२ रन जोड्दै अलराउन्ड प्रदर्शन गरे। उनले १५ बलमा चार छक्का प्रहार गरे। ओपनरद्वय कुशल भुर्तेल र आसिफ सेखले राम्रो साझेदारी गर्न सकेनन्।

३.४ ओभरमा आसिफ १० रनमा नै पवेलियन फर्किए। त्यसपछि आएका कुशल मल्लले पनि ठूला सट खेल्ने प्रयास गरे। यद्यपि, ११औं ओभरमा कुशल २९ रनमा रवि बिस्नोईद्वारा आउट भए। त्यसअघि भुर्तेल दोस्रो विकेटका रूपमा आउट भए। भुर्तेलले २८ रन जोडे।

 नवौं ओभरमा पनि कप्तान रोहित पौडेल ३ रनमै पवेलियन फर्किएपछि नेपालको ब्याटिङले केही समय संघर्ष गर्नुप¥यो। तर, दीपेन्द्र र सन्दीप जोराले पाँचौं विकेटका लागि ४७ रनको साझेदारी गर्दै जितको आशा दिलाए।

यद्यपि, १५ र १६औं ओभरमा दुवै ब्याटर पवेलियन फर्किएपछि नेपालको जित टाढियो। दीपेन्द्र ३२ रन र सन्दीप जोरा २९ रनमा आउट भए। करण केसीले १८ रन जोडे पनि जितका लागि पर्याप्त भएन।

भारतको बलिङमा आवेश खान र रवि बिस्नोईले समान तीन तथा अर्शदीपले दुई र साई किशोरले एक विकेट लिँदै नेपालको इनिङलाई लक्ष्य पूरा गर्न दिएनन्। त्यसअघि टस जितेको भारतले विस्फोटक ब्याटिङ गर्दै चार विकेटको क्षतिमा दुई सय २ रनको विशाल योगफल बनायो।

आक्रामक ब्याटिङ गरेका ओपनर जैसवालले ४९ बलमा नै सय रन जोडे। नेपाली बलरमाथि पूर्ण हाबी भएका जैसवालले आठ चौका र सात छक्का प्रहार गरे। जैसवाल १६.२ ओभरमा दीपेन्द्रद्वारा क्याचआउट भए।

भारत १ सय ५० रनको बलियो स्थितिमा हुँदा जैसवाल चौथो विकेटका रूपमा पवेलियन फर्किए। भारतले पहिलो ओभरदेखि आक्रामक ब्याटिङ गर्‍यो। भारतले ९.१ ओभमा नै सय रन बटुल्दै नेपाली बलरमाथि दबाब सिर्जना गरिराखे। यसै ओभरको पाँचौं बलमा दीपेन्द्रले भारतका कप्तान रुतुराज गायकवाडलाई २५ रनमा आउट गर्दै पहिलो विकेट लिए।

त्यसपछि भने नेपालले १५औं ओभरसम्म कसिलो बलिङ ग¥यो। यस क्रममा नेपालले दुई विकेट लिँदै ३४ रन खर्चियो। यद्यपि, अन्तिम पाँच ओभरमा नेपालका बलरले लय गुमाउँदै ६४ रन खर्चिए। यद्यपि, नेपालका बलर सन्दीप लामिछानेले बलियो टोलीसँग खेल्दा अनुभवको कमीका कारण अन्तिम समय रन बढी गएको बताए।

‘भारत पनि बलियो टोली हो र हामीले प्रयास पनि गर्‍यौं। तर, बलियो टोलीसँग खेल्दा अनुभवको कमीले अन्तिमका ओभर बढी रन गयो,’ सन्दीपले भने। पाँचौं विकेटका लागि शिवम् दुवे र रिन्कु सिंहले ५२ रनको साझेदारी गर्दै सय रनको आँकडा पार गराए।

रिन्कु ३७ रन र शिवम् २५ रनमा नटआउट रहे। यस क्रममा शिवम्ले १९ बलमा दुई चौका र एक छक्का र रिन्कुले १५ बलमा दुई चौका र चार छक्का हिर्काए। डेथ ओभरमा बलिङ गर्न आएका अविनाश बोहोराले २५ रन खर्चिएपछि नेपालमाथि दबाब पर्‍यो।

माल्दिभ्सविरुद्ध ६ विकेट लिएका अविनाशले निकै खराब बलिङ गरे। चार ओभरमा उनले ५३ रन खर्चिंदा एक विकेट पनि लिन सकेनन्। नेपालका सबै बलर महँगा साबित भए। यद्यपि, दीपेन्द्रसिंहले महत्वपूर्ण दुई विकेट लिँदै कमजोर बलिङलाई साथ दिए। तीन ओभर बलिङ गरेका सन्दीपको नाममा पनि एक विकेट रह्यो।

तपाईको प्रतिक्रिया
  • खुसी (0%)
  • दुःखी (0%)
  • अचम्मित (0%)
  • हाँस्यास्पद (0%)
  • आक्रोशित (0%)
टिप्पणी

सम्बन्धित खबर

लोकप्रिय

सामाजिक संजाल

भर्खरै

छुटाउनुभयो कि ?